တေးသံရှင်ဆိုတေး အရေးပေါ်ဆောင်မှ ဦးနှောက်နှင့်အာရုံကြော ခွဲစိတ်ကုသဆောင်သို့ ပြောင်းရွှေ့

မန္တလေး၊ စက်တင်ဘာလ ၃

မန္တလေးပြည်သူ့ဆေးရုံကြီးတွင် ဦးခေါင်းပိုင်းဒဏ်ရာဖြင့် ၄၈ ရက်ကြာ တက်ရောက်ဆေးကုသလျက် ရှိသော တေးသံရှင်ဆိုတေး၏ ကျန်းမာရေးအခြေအနေ ကောင်းမွန်လာသည့်အတွက် စက်တင်ဘာလ ၂ ရက်နေ့ ညနေပိုင်းမှ စတင်ကာ အရေးပေါ် အထူးကြပ်မတ်ကုသဆောင်မှ ဦးနှောက်နှင့် အာရုံကြောခွဲစိတ် ကုသဆောင်သို့ ပြောင်းရွှေ့ကုသလျက် ရှိကြောင်း အဆိုပါဆေးရုံကြီးမှ ဆေးနှင့်လူမှုဆက်ဆံရေး အရာရှိ ဦးမင်းလွင် က The Voice သို့ ပြောကြားသည်။

"လူနာက စကားတော့ မပြောသေးပါဘူး။ အသိတော့ ဝင်လာပါတယ်။ အဆောင်ပြောင်းတဲ့ နေ့တုန်းကဆို ဝှီးချဲ ပေါ်မှာထိုင်ပြီး ဆေးရုံကို လျှောက်ပတ်ပြတယ်။ ပြောရရင်တော့ စိုးရိမ်ရတဲ့ အခြေအနေကနေ လွတ်သွားတယ်ဆိုတဲ့ သဘောပေါ့" ဟု ဦးမင်းလွင်က ထပ်မံပြောကြားသည်။

တေးသံရှင် ဆိုတေးသည် ဇူလိုင်လ ၁၄ ရက်နေ့ မွန်းလွဲ ၁၂ နာရီ ၃၀ မိနစ်ခန့်က ရန်ကုန်-မန္တလေး အမြန်လမ်း မိုင်တိုင်အမှတ် ၂၉၁/၃ နှင့် ၄ ကြားတွင် ယာဉ်တိမ်းမှောက် ခဲ့သောကြောင့် မန္တလေးဆေးရုံကြီးရှိ အထူးကြပ်မတ် ကုသဆောင်တွင် ဆေးကုသမှုခံယူလျက်ရှိရာ စက်တင်ဘာလ ၂ ရက်နေ့ ညနေပိုင်းတွင် ဦးနှောက်နှင့် အာရုံကြော ခွဲစိတ်ကုသဆောင်သို့ ပြောင်းလဲကုသလျက် ရှိကြောင်း ဆိုတေး၏ အဒေါ်ဖြစ်သူ ဒေါ်ခင်ချိုချိုဝင်းက ပြောကြားသည်။
"သူ့ကို ဆေးရုံစတင်တုန်းကတော့ ဦးနှောက်နဲ့ အာရုံကြော ခွဲစိတ်ဆောင်မှာ တင်တာလေ၊ အရေးပေါ် အခြေအနေကြောင့် အထူးကြပ်မတ်ဆောင်ကို ပြောင်းလိုက်ရတာ။ အခုကျန်းမာရေးကလည်း တဖြည်းဖြည်း ကောင်းလာပါပြီ။ ဟိုတစ်နေ့က လေကောင်းလေသန့် ရအောင်လို့ ဆေးရုံထဲကို ပတ်ပြီး လိုက်ပြပေးတယ်" ဟု ၄င်းက ထပ်မံပြောကြားသည်။

ရန်ကုန်မှမန္တလေး တောင်သာဘက်သို့ အသွား မိုင်တိုင် ၂၉၁/၃ မိတ္ထီလာ အမြန်လမ်းမပေါ်တွင် ဇူလိုင်လ ၁၄ ရက် နေ့က အဆိုတော် ဆိုတေး၊ ဇနီး၊ ခယ်မနှင့် ယာဉ်မောင်းတို့ စီးနင်းလာသည့် မော်တော်ယာဉ်မှာ ဘီးပေါက်ကာ ယာဉ်တိမ်းမှောက်ခဲ့ပြီး ၄င်းဖြစ်စဉ်ကြောင့် ဇနီးဖြစ်သူ မဝင့်ကုဋေသူ (ခ) ချောချောမှာ ကွယ်လွန်ခဲ့သည်။


From: The Voice Weekly (facebook)